تونس تسمع فيّا؟

وِين نمشي بروحي وِين نهزّها ...؟ 

آش نقول للّي رُوحه عليك فناها؟

بكيت و تعبت من شهقتي؟ ضحكت بفمّي و عينيّة ضايعة لا لون و لا تعبير 

الّي يقول تعبير و الّي يقول تكبير ...

كلّهم وليداتك أيتامك...

غشاشرك الّي في الحلال و الّي ولد حرام زقّوم

انت ترابك هو هو

شمسك هي هي

الّي جيعان يحبّك تغّذيه و الّي حفيان يحب ترابك يسايسه ما يحفيه

و الّي شبعان يحبّك طريقه تورّيه 

انا نمّن بيك نمّن الّي عندك ما تقوللنا

تكلّم حلّ فمّك شبيك ساكتة

ثور اسخطنا ولاّ اسكت و اسمعنا ... أما ما تعطيناش بظهرك 

فمّا الّي صلاّلك و فمّا الّي في صحّتك قلب الكاس

و الّي في بابك وقف عسّاس و لا  عمره خمّم يهدّ القديم و يطلّع ساس

و فمّا شكون هزّ روحو و مشا خاطر لا فهمك لا فهمته  

أنا اليوم يا تونس نقلّك الّي ضقت بيّا  

وما عادش عندي فيك بلاصة 

نستنّى فيهم باش يجبدو السّكاكن على بعضهم

و نستنّاك تقول كلمة تذكّرهم في ماضيهم و الّي تعدّى عليهم 

ولاّ وقيّت تاذينا و تاذيهم

الّي يحبّ آذانك يلزمو زادة يعشق بيرانك 

و الّي بالتّقوى غنّالك يلزمو يتعلّم يقدّس ألوانك

يزّينا ما ضربنا عليك و إنت تنصر الّي يعادينا و يعاديك

يزّي نا شميستك فرحت بلّي من برّه يجيك 

و نحنا الداخل نعيشو كابوس لا يورّيك

اسمعنا أغزرلنا حسّ بينا 

توَجَّعنا و ثُرنا و فرحنا و طاحت بينا

يا تونس كلام العشقة الهايمة وفا 

و النّوم من عينينا مشا

حلمنا و صحنا و غنّينا و الّي كان آذبنا زادة مشا

يزّينا راهو الدمّ من عينينا نشح 

و صوتنا بالصّياح بحّ

يا تونس تكلّم الزّح 

بإسم الدّقلة و البلح 

باسم الفلاح الّي سقا وكدح

باسم الغشّير الّي أيّس و بالنّار قدح

يا تونس نكتب و الدّمعة دمّ

و الكره و العنف ركبّلي الغمّ

يا تونس ماك مرا ماك راجل ماك أمّ

 ماك فنّانة ماك فاهمة و شايفة و عارفة

حاسّة بينا بالنّار الّي جواجينا

بالوجيعة الّي تقتل فينا  

و الشهاوي الّي فينا دفينة 

فوق ترابك تمشي ساقينا

الّي لبست و الّي نحات و الّي بدنها عطات 

إلّي ربّي اللّحية و إلّي ما ربّاش

و إلّي ما تربّاش و ما لقاش باش 

إلّي يخرج منّك يبدي زهمولة زايلة

و عينه عليك و ريقته سايلة 

يسكّر عينيه و يتفكّر القايلة

الحسّ البايت الريحة البنينة و الكلام الهافت

و غناية بعيدة  بحبّك باحت

يا تونس الكلام وفا و الحبّ طفا

هذه لاهي و طنيّة لاهي شاعريّة 

هذه عبوديّة 

أنا ليك إسمعني راهو موش كلام ... أما بدمّي نفديك

مع حبّي