أخي المواطن أختي المواطنة

أخي المواطن أختي المواطنة

كانك اسلامي مرحبا و كانك يساري مرحبا و كانك لاك لاك فألف أهلا و سهلا في بلاد هيّ بيدها لاهي لاهي... يحيا الاختلاف و التخّلف عاش الخليفة عاش عاش عاش

بلاد اللاّهي اللاّهي هي عبارة على روميكس أمّة عاطية على وطن تجبد شويّة مالدّولة تحسّ بيها كلّي متأثرة دشّيشة و لاّ طريّف بالمملكة و ساعة ساعة تجبد على موجة أخري "أولد سكول" أو ما يسمّى بالخلافة ... صحّة  سي خليفة سلّملي على حجّامك

 أما هي شقفة أرض لا فيها مالك و لا مملوك و الضّمان الوحيد هو انّو حقّك في كلّ الحالات و بقدرة قادر باش يكون مفكوك

كانك عاليمين دزّ شوية من غادي ولاّ تتنعت بالصبع يا ارهابي يا غلام مدام بنانا يا صهيوني و كانك كلّي على يسار فتزحلق تحت حسّ مسّ و لاّ بئس المصير من حيث الوالدة باش تتسبّ و تكفير و التهمّ على كلّ لون يا كريمة ابداع في السّبان خمسة و خميس اللّه واحد و بالتاّلي كان راسك يوجع و عندك الشّقيقة فكّ  عليك احمي نفسك بالموسيقى

حلّ وذنيك حلّ عينيك حلّ يدّيك بالكبير (و يا حبّذا و هو الأهمّ انّك تحلّ ساقيك)... ثمّ شرّع بيبانك و الشّبابك طاقة.. اما فمّك ماذا بينا كان ماتراش مانع (و نحن عندنا فيك الثّقة نعرفو والّي انت مواطن صالح ما تنجّمش تكون ترى مانع) فمّك يقعد مسكّر الى أجل غير مسمّى و مخّك و قلبك بلّجهم بألف سلسلة فاش قام الخساير ؟؟ تخممّ ؟؟؟ تحسّ و تفهم , نحنا نسمّعوك نفكّرولك نحبّولك نحسّولك و نقررّولك...

و فمّك حلّو في المناسبات و اللّحظات المشحونة بالوطنيّة باش تغنّي ما تيسّر من النّشيد الوطني في نسخه المتعدّدة و المختلفة... لا الحقّ ديمقراطية

كي تقوم الصّباح حطّ فيروز ولاّ قران و لاّ مزود و لاّ استعن بصديق اما ردّ بالك ردّ بالك ردّ بالك تحطّ راديو ولاّ اخبار و لاّ نقاش... و اذا التّمساح يطلع ثعلب فحليب الغولة بالتّالي علامة ربّانية و واضحة و حمّ حمّ حمّ حمّة حمّة حمّادي و لاّ فكّنا من حمّة و من حمّادّي هو حمّة للتّاريخ فقط حمّة  راجل و سيد الرّجال اما خسارة كاينّو موش خليفة ... يخلف اللّه

انطلق في يومك اما كانك بطّال من المستحسن تصبح راقد ... يقول القايل اش مقوّمك؟؟ استحفظ على طاقتك وين تعرف عالدّنيا خاصّة في وقت الّي العلامات الرّبانية اكثر من البطاطا(البطاطا مقطوعة خاصّة بعد الفياضانات متاع المطر و متاع الوحي و الهداية بحرنا بحرنا)

لا تحكيلي لا على حقوق و لا على واجبات عيب و موش في سبرنا ولا تابع هويّتنا و قاللكم مولى الدّار "فاقد الشّيء لا يعطيه" نستمبطو الخدم نطيرو لكولالامبور  "يا ديني" "يا دينك"

أخيرا و ليس آخرا

الفصل الأوّل

لكلّ مواطن الحقّ في تفشيخ النّوم  و الرّاحة و الاستجمام و اللاّ فعل في المكسيمو

تونس دولة صاحبة جوّ و ناس ملاح لا تهبّش لا تدبّش

مسموح لكلّ مواطن احتساء مشروب التيزانا الّي هو و الحقّ يقال مشروب مطابق لهويتنا العربيّة الاسلاميّة البربريّة و المحتلّة التّابعة (و لكلّو تابع بعضه) و مشروب ما يتنافاش مع مبادئ اليسار و يساعد كذلك الأغلبيّة الصّامتة على الحفاظ على هدوءها و لامبالاتها (و بالتّالي راس المال يقعد لاباس) امّا الأغلبيّة السّاحقة المقهورة المضطهدة و المقموعة فهذوكم مرخّص لهم تدخين كلّ الحشائش و قراءة كلّ الكتب الفلسفيّة الّي تحتوي على نظريّة فصل الجسد على الروّح الى أن نلقاو حلّ للجّوع و البطالة

قصّ الرّاس تنشف العروق

و كان شدّكم الضّحك في ساعة عصيبة و لاّ البكاء في ساعة سعيدة فاستهداو باللّه ولاّ صلّيو عالنّبي ولاّ اسمعو غناية ولاّ أعملو دورة ولاّ تكبّو أرقدو فالنّوم هو الحلّ و ليس المشكل

و كما يقول المثل العالمي المهبول بالضّبط "  أخي المواطن اذا اغتصبوك فحاول ان تستمتع" أو في رواية اخرى" اذا نكحت زيدها لصّ"

مع حبّي

مع حبّي